عايزة تتعلمي افضل تكنيك عشان تحافظي على بشرة وشك مشرقة وناعمة ؟ تعالي اعرفي معانا طريقة غسل الوجه بشكل صح ومناسب لنوع بشرتك, غسل الوجه يوميا يعتبر طريقة سهلة عشان نحافظ على بشرتنا صحية لكن المهم اننا نعمل ده بشكل صح عشان البشرة ميحصلش فيها اي جفاف او تلتهب, وكمان هنقولك ازاي تغسلي وشك لو بشرتك بتعاني من حب الشباب وحساسة او جافة اوي.
طريقة غسل الوجه:
– طريقة الغسيل اليومي العادي للوجه:
1- ترطيب البشرة بالمية:
اول خطوة هي وضع كمية كافية من المية الدافية على الوجه لتتجنبي تهيج للبشرة.
2- تطبيق المنظف:
ضعي المنظف المناسب لنوع بشرتك بكمية صغيرة, ودلكي بيه البشرة في حركات دائرية, وتأكدي ان المنظف على البشرة كلها, واستمري في التدليك لمدة من 30 ثانية لدقيقة.
تجنبي استخدام صابون اليد او الجسم كمنظف للوش, لان جلد الوجه حساس اكتر من اي مكان آخر في الجسم لا ذلك قد يسبب جفافه وتهيجه.
3- تقشير البشرة:
تقشير البشرة من الخطوات المهمة جدا لانه ينضف المسام وبيزيل الخلايا الميتة, وبيمنع انسداد المسامات وبيخلي البشرة نقية وصحية, ممكن تعملي التقشير بأي مقشر للبشرة سواء من الماركات الموجودة في السوق او مقشر طبيعي, دلكي البشرة بالراحة في حركات دائرية وركزي على المناطق الدهنية اكتر, والتقشير يكون بالكتير يكون مرتين في الاسبوع, لان التقشير زيادة عن اللزوم او بقوة ممكن يسبب تهيج للجلد.
ممكن تعملي مقشر طبيعي بسيط كل اللي هتحتاجيه معلقة صغيرة عسل نحل, ومعلقة صغير سكر خشن, ومعلقة صغيرة مية او لبن, اخلطيهم مع بعض واعملي بيهم تدليك لبشرتك زي ما قولنا.
4- شطف البشرة:
بعد الغسول اشطفي البشرة بمية دافية, واتأكدي انك اتخلصتي من كل اثار الغسول والمقشر, بعدها استخدمي فوطة لتنشيف الوش, من غير ما تفركي البشرة بالفوطة بس استخدمي طريقة الطبطبة, لان الفرك ممكن يسبب التجاعيد وتهيج الجلد.
5- استخدام التونر:
هذة الخطوة تعتبر اختيارية, ادهني بشرتك بقطنة مبللة بالتونر, مع التركيز على المناطق الدهنية واللي فيها مسام واسعة.
عند شراء التونر تأكدي انك تستخدمي نوع يكون خالي من الكحول, وخصوصا لو بشرتك من النوع اللي بيقشر .
وممكن تعملي تونر بمكونات طبيعية في البيت, اخلطي كميات متساوية من المية وعصير الليمون, واستخدميه كتونر, او ممكن تستخدمي جل الصبار, او مية الورد كبديل طبيعي للتونر.
6- ترطيب البشرة بكريم مرطب مناسب:
اختاري كريم مرطب مناسب لنوع بشرتك, الكريم بيساعد على حماية بشرتك والحفاظ على رطوبتها.
ولو غسلتي بشرتك قبل النوم, جربي انك تستخدمي مرطب اتقل من مرطب النهار عشان يساعد على تجديد بشرتك طول الليل.
وعند التعرض للشمس استخدمي مرطب بيحتوي على عامل حماية من الشمس لا يقل من 30, او صن بلوك بعد الكريم المرطب.
– طريقة غسل البشرة المعرضة لحب الشباب:
1- اغسلي البشرة مرتين:
بالنسبة للبشرة المعرضة لحب الشباب, الافضل تغسل مرتين في اليوم, مرة الصبح ومرة بالليل, الغسيل الصبح ينعش البشرة ويطهرها من البكتيريا اللي ممكن تكون نمت في فترة الليل, والغسيل بالليل مهم لازالة العرق والاوساخ والمكياج من البشرة.
وغسل البشرة اكتر من مرتين في اليوم ممكن يسبب جفافها وتهيجها, لان كتير من اللي بيعانوا من حب الشباب بيفتكروا ان غسيل البشرة اكتر هيخليها احسن او صحية اكتر, لكن هذا خطأ لان جلد الوجة حساس ورقيق وممكن غسيله زيادة عن اللزوم يضره ويضعفه.
2- استخدمي منظف للبشرة المعرضة لحب الشباب:
منظفات الوجه العادية الموجودة في السوق غالبا ممكن ان تزيد مشكلة حب الشباب وتجعله اسوأ لان المواد الكميائية والكحول والزيوت اللي موجودة فيها ممكن تهيج بشرتك وتسبب في انسداد المسام, عشان كده لازم تختاري الانواع اللي معمولة مخصوص للبشرة اللي بتعاني من حب الشباب.
ولو حب الشباب شديد اوي ممكن تستخدمي غسول طبي يحتوي على مكونات بتساعد على قتل البكتيريا اللي ممكن تسد المسام وتسبب حب الشباب, وممكن أن تستشيري دكتور في اختيار الغسول المناسب ليكي, او بكل بساطة لما تروحي تشتري المنظف اختاري النوع اللي مكوناته بتحتوي على حمض الساليسيليك, او السلفاسيتاميد الصوديوم, او البنزويل بيروكسايد.
3- لا تدلكي البشرة بقوة:
لا تدلكي البشرة بقوة, لان هذة الطريقة ممكن تسبب تمزقات صغيرة في الجلد, وممكن تسبب التهاب الجلد وتعمل مشاكل اسوأ من حب الشباب.
وممكن بدل استخدام مقشر للبشرة, ممكن تستخدمي فوطة ناعمة لتدلكي بيها البشرة بخفة في حركات دائرية, ولا تستخدمي فرشة تقشير على بشرتك المعرضة لحب الشباب.
4- اتجنبي استخدام المية السخنة:
المية السخنة ممكن تسبب احمرار والتهاب الجلد, الافضل تستخدمي مية دافية, وحاولي تتجنبي البخار لو بشرتك بتعاني من حب الشباب لان الحرارة تجعل المشكلة اسوأ.
5- نشفي بشرتك بفوطة ناعمة:
الافضل انك تخصصي فوطة ناعمة للوش تنشفي بيها على طول بعد الغسيل, واتأكدي انك بتغسلي الفوط بشكل مستمر, عشان متتراكمش عليها بكتيريا تتنقل لبشرتك وانتي بتنشفيها.
6- استخدمي مرطب خالي من الزيوت:
لو بشرتك بتعاني من حب الشباب, والمسام بتتسد بسهولة, يبقى الافضل انك تستخدمي كريم مرطب خالي من الزيوت, وممكن تختبري الكريم بانك تستخدميه على جزء صغير من البشرة لتكتشفي تأثيره على بشرتك قبل ما تستخدميه للبشرة كلها.
ممكن تستخدمي جل الصبار هو مهديء للبشرة, ويعتبر مرطب طبيعي وخفيف خالي من الزيوت.
ولو بشرتك من النوع الدهني, ممكن تستخدمي المرطب فقط على الاماكن الجافة في الوجه .
– طريقة غسل البشرة الجافة:
1- اغسليها مرة واحدة في اليوم:
2- استخدمي منظف خفيف او زيت:
البشرة الجافة بعد الغسيل بتجف اكتر, عشان كده مهم جدا اختيار المنظف المناسب, اختاري دايما منظف يكون خفيف جدا مخصوص للبشرة الجافة, او استخدمي الزيت كمنظف, ممكن تستخدمي زيت اللوز الحلو, او زيت الجوجوبا, او زيت جوز الهند, او زيت الزيتون, اختاري النوع المفضل ليكي ودلكي وشك بيه في حركات دائرية بايدك او بفوطة, وبعدها اغسلي الوش بمية دافية.
ولما تيجي تختاري المنظف اختاري الانواع الخالية من صوديوم الغار, او لوريث سلفات, او الكبريتات لانها مواد تنضيف قوية وقاسية وهتسبب جفاف البشرة اكتر.
3- تقشير البشرة:
قشري بشرتك من مرة لمرتين في الاسبوع عشان تتخلصي من الجلد الميت وخصوصا لو بشرتك بتعاني من التقشر, وممكن تجربي الفرك اليومي بفوطة ناعمة بحركات دائرية على الاماكن الجافة اوي او المقشرة, والمفتاح هو التقشير من غير تجفيف البشرة او التسبب في تهيجها.
ولو بشرتك جافة اوي ممكن تقشريها باستخدام الزيت, اغمسي فوطة ناعمة او قطعة قطن في زيت جوز الهند او زيت الزيتون او اي زيت من اختيارك, وافركي البشرة بالزيت في حركات دائرية, الطريقة دي هتقشر بشرتك وتغذيها في نفس الوقت.
متستخدميش الليفة او الفرشة او اي ادوات كاشطة على بشرتك, لان الجلد الجاف معرض اكتر للتمزق والتجعد والتلف اكتر من الجلد العادي او الدهني, عشان كده مهم جدا انك تتعاملي معاه بخفة جدا.
4- الشطف بالمية الباردة او الدافية:
المية السخنة هتسبب جفاف الجلد اكتر, عشان كده الافضل انك تستخدمي مية باردة او مية دافية للشطف, وكمان استخدام المية كتير بيسبب جفاف البشرة, الافضل ميكونش في مبالغة في شطف الوجه عني اشطفيه مرة او اتنين بس, وممكن تتحكمي في كمية المية بانك تستخدمي فوطة مبلولة بدل ما ترشي الوش بالمية الجارية.
5- نشفي الوش بفوطة ناعمة:
كمان البشرة الجافة الافضل انك تستخدمي لها فوطة ناعمة, واستخدمي طريقة الطبطبة من غير فرك للبشرة, عشان تحافظي عليها من الالتهاب او التقشر.
6- الكريم المرطب:
بعد ما خلصنا كل الخطوات نضفنا البشرة ونشفناها, اختاري المرطب المناسب للبشرة الجافة عشان تحافظي عليها نضرة ورطبة, وعادة بتكون المرطبات الطبيعية او اللي معمولة في البيت هي الافضل للبشرة الجافة, لان كل مكوناتها هتكون طبيعية وخالية من اي مواد كيميائية ممكن تسبب تهيج او جفاف البشرة.
ولو هتستخدمي مرطب من المرطبات اللي موجودة في السوق, اختاري دايما اللي بتحتوي على زبدة الشيا, او زبدة الكاكاو, او اي عناصر مغذية تانية عشان تحمي بشرتك من الجفاف.
ولو بشرتك بتعاني دايما من التقشر, بعد ما تغسليها بكام ساعة, ممكن تدليكها بزيت جوز الهند او جل صبار الالوفيرا.
