زيت الخروع من انواع الزيوت التي لها فوائد جمالية كثيرة لانه يحتوي على خصائص مضادة للبكتيريا ومضادة للفطريات مع بعض, غني بالعناصر الغذائية الحيوية زي فيتامين E والمعادن والبروتينات, المطلوبة لشعر وجلد صحي, كما يساعد على تقليل التهاب الجلد, وبيساعد في علاج كتير من الامراض الجلدية زي الاكزيما والصدفية, بيحافظ على بشرة رطبة خالية من التجاعيد, والنهاردة من خلال موضوعنا هنقولك على استخدامات زيت الخروع الجمالية للبشرة والشعر وكمان الضوافر.
استخدمات زيت الخروع الجمالية:
1- لعلاج تساقط الشعر:
– زيت الخروع معروف بانه من اكتر الزيوت اللي بتساعد في علاج تساقط الشعر, وعلاج الشعر الخفيف, كل اللي هتعمليه بس دلكي زيت الخروع على فروة الراس, وسيبيه لمدة 30 دقيقة وبعدين اغسليه بشامبو خفيف, ممكن تكرريه مرتين في الاسبوع.
– اخلطي معلقة كبيرة من بذور الحلبة مع 5 معالق كبيرة زيت خروع و 5 معالق زيت جوز الهند, سخنيهم مع بعض لحد ما يكون رواسب سودا, خدي الرواسب دي دلكي بيها الشعر وفروة الراس, سيبيها 30 دقيقة وبعدين اغسليه, كرري الماسك مرتين في الاسبوع, الماسك ده بيساعد على تجديد الشعر, بيساعد الشعر على النمو بشكل اسرع, كمان بيعالج الشيب.
2- زيادة نمو الشعر:
– زيت الخروع بيحفز او بيزود نمو الشعر بشكل فعال جدا, ممكن تستخدميه كزيت للشعر تدهنيه بعد غسل الشعر, بس عشان الزيت سميك او تقيل الافضل تعمليه كماسك اخلطي معاه كمية متساوية من زيت جوز الهند وممكن تضيفي كام نقطة من اي زيت عطري “اختياري”, دلكي الزيت على الشعر وفروة الراس وغطيه بطاقية الشعر او كيس بلاستيك عشان الزيت يخترق فروة الراس, وسيبيه طول الليل واغسليه الصبح, ولو مش هتقدري تنامي بيه ممكن تسيبيه لمدة من 30 – 45 دقيقة وبعدين اغسليه, كرري الوصفة مرة في الاسبوع.
– ممكن تخلطي كميات متساوية من زيت الخروع مع جل صبار الالوفيرا, دلكي شعرك وفروة الراس بالخليط, غطي الشعر بفوطة سخنة, وسيبيه لمدة 30 دقيقة او طول الليل, وبعدها اغسليه بالشامبو, والماسك ده يعتبر منشط ممتاز جدا للشعر وبيحسن حالة الشعر وفروة الراس.
3- صحة فروة الراس:
لترطيب وتغذية فروة الراس, دفي زيت الخروع ودلكي فروة الراس بالزيت, سيبيه لمدة 30 دقيقة وبعدين اغسليه, بيساعد على تغذية فروة الراس, وبيحمي فروة الراس من اي عدوى بكتيرية وفطرية ومن قشرة الشعر, ممكن تعملي العملية دي كل اسبوع مرة او على فترات كل ما تحسي ان الشعر محتاج.
4- علاج الشعر التالف:
فيتامين E اللي موجود في زيت الخروع ممتاز جدا لترطيب الشعر الجاف والهايش, وعلاج اي ضرر او تلف في الشعر, اخلطي كميات متساوية من زيت الخروع وزيت جوز الهند مع كام نقطة من اي زيت عطري, خدي الزيت على ايدك ودلكي بيه فروة الراس, غطي الشعر وسيبيه طول الليل واغسليه الصبح بالشامبو, كرريه مرة واحدة في الاسبوع.
5- علاج انقسام اطراف الشعر:
– ممكن تستخدمي زيت الخروع لوحده, حطي كمية بسيطة من الزيت على اطراف الشعر ودلكيها كويس هتساعد على علاج الاطراف المنقسمة.
– او اخلطي صفار 2 بيضة مع 2 معلقة كبيرة زيت خروع, وبعدين خففي الخليط بنص كوباية مية, دلكي فروة الراس والشعر كله لحد الاطراف بالخليط, سيبيه من 15 – 20 دقيقة, وبعدين اغسليه بمية باردة وشامبو خفيف.
6- للمعان الشعر:
اخلطي 3 معالق كبيرة زيت خروع مع 1 معلقة كبيرة زيت خردل “زيت المسطردة”, حطيهم في ازازة بقطارة تكون غامقة, رجيهم مع بعض كويس, وبالقطارة حطي من الخليط على فروة الراس, دلكيه لمدة 5 دقايق عشان تتاكدي ان فروة الراس امتصت الخليط كويس وعشان تزودي الدورة الدموية, سيبية على الشعر لمدة ساعة وبعدين اغسليه بشامبو خفيف.
7- بلسم طبيعي:
حطي نقطة من زيت الخروع على كمية البلسم اللي هتستخدميها لشعرك وحطيه على الفرق في نص الشعر, سيبيه لمدة 15 دقيقة, وبعدين اغسليه.
8- علاج التجاعيد:
زيت الخروع من انواع الزيوت اللي بتساعد على منع وعلاج التجاعيد والخطوط الرفيعة, حطي طبقة خفيفة جدا من زيت الخروع على البشرة ودلكيها ببطء في حركات دائرية, وخدي وقتك في التدليك وركزي اكتر على الاماكن اللي فيها مشاكل في البشرة, وبعدها سيبيه كام دقيقة على البشرة وبعدين اغسليه.
9- لتوهج البشرة:
زيت الخروع بيساعد على تطهير البشرة وترطيبها وازالة السموم والحصول على بشرة ناعمة وصحية, وممكن تستخدمي منظف زيتي من زيت الخروع فعال جدا في تنضيف البشرة من الزيوت الزيادة ومن الرؤوس السودا والبثور وبيحافظ على البشرة صحية, وطريقة تحضير المنظف هنعرفها مع بعض.
لو بشرتك دهنية اخلطي 1/3 كوباية زيت خروع مع 2/3 كوباية زيت زيتون, للبشرة المركبة او المختلطة اخلطي ¾ كوباية زيت زيتون مع ¼ كوباية زيت خروع, للبشرة الجافة اخلطي 8/9 زيت زيتون مع 1/9 كوباية زيت خروع.
بعد ما تخلطي كميات الزيوت حسب نوع بشرتك, خدي شوية من الخليط على ايدك افركيه لحد ما يدفى, دلكي وشك بالزيت في حركات دائرية, كرري العملية لحد ما تحسي ان بشرتك عليها كمية زيت كفاية, بعدها هاتي قطعة قماش نضيفة بليها بمية دافية, استرخي ونامي على ضهرك وحطي القماشة على البشرة وسيبيها لحد ما تبرد, كرريها من 5 – 6 مرات, دلوقتي امسحي الزيت الزيادة من على بشرتك بالقماشة, بعدين اشطفيه بمية باردة عشان تشيلي اثار الزيت ونشفي البشرة بطريقة الطبطبة من غير فرك.
10- علاج ندبات البشرة:
زيت الخروع بيساعد على علاج ندبات البشرة وبقع العمر بشكل طبيعي, لانه بيحتوي على احماض دهنية بتساعد على تجديد انسجة البشرة وده مع الوقت والاستمرار بيساعد على علاج الندبات والبقع, ادهني البشرة كل يوم قبل النوم بزيت الخروع واغسليه الصبح.
11- لترطيب ولمعان الشفايف:
لو عايزة ترطبي بشرتك وتخليها بتلمع بشكل طبيعي, حطي كمية بسيطة من زيت الخروع على الشفايف ودلكيها هيرطب الشفايف ويديها لمعة طبيعية.
12- تكثيف الرموش والحواجب:
زيت الخروع من اكتر الزيوت المعروفة بفعاليتها لتكثيف الرموش والحواجب, حطي كمية من زيت الخروع على الحواجب ودلكيها كويس, وبعصاية ماسكارا قديمة او بعود قطن حطي من الزيت على الرموش, وسيبيه طول الليل واغسليه الصبح, بعد فترة قصية جدا هتلاحظي كثافة ونمو الحواجب والرموش.
13- تنعيم الايدين:
دلكي ايدك كل يوم قبل النوم بزيت الخروع لتنعيمها وازالة التجاعيد, وزيت الخروع يعتبر بديل لكريم الايد الليلي لو دهنتيه بشكل يومي هتصحي تاني يوم الصبح تلاقي ايدك ناعمة جدا.
14- علاج تكسر الضوافر والجلد الجاف اللي حوالين الضوافر:
لو بتعاني من تكسر الاضافر ومن الجلد الجاف حوالين الضوافر الحل في زيت الخروع, ادهني الضوافر والجلد اللي حواليها كل يوم قبل النوم بزيت الخروع, هينعم الجلد ويمنع الضوافر من التكسر.
15- علاج علامات التمدد والسيلوليت:
دلكي علامات التمدد في الجسم والمناطق اللي فيها سيلوليت بزيت الخروع في حركات دائرية لمدة من 5 – 10 دقايق وبعدين لفي المكان بكيس بلاستيك وممكن تحطي على المكان اربة مية سخنة عشان تساعد اكتر وسيبيه ملفوف ساعة او ساعتين او اكتر على قد ما تقدري, وبعدها فكي الكيس واغسليه بمية دافية, كرريها اكتر من مرة في الاسبوع لحد ما تتخلصي من علامات التمدد والسيلوليت.
16- علاج تشقق الكعبين:
ادهني كعوب الرجل بكمية كبيرة من زيت الخروع, وبعدين البسي شراب وسيبيه لمدة ساعة اونامي بيه واغسليه الصبح, هيساعد جدا على تنعيم كعب الرجل وازالة التشققات والجفاف.
المصدر:وكالات
