الرموش من الخطوات المهمة اللي ضروري نهتم بيها في مكياج العيون لانها بتظهر جمالهم وبتبرزهم اكتر, وكتير من البنات اكيد بيستخدموا الماسكارا للغرض ده بس في النهاية بردو الرموش مش بتطلع زي ما هما عايزين, عشان كده النهاردة هنقولك على نصايح لرموش جذابة.
نصايح لرموش جذابة:
1- اختاري اللون الصح:
قبل اي حاجة لازم تتأكدي الاول انك مختارة لون الماسكارا الصح, ممكن نكون قرينا معلومة او سمعنا كتير من خبراء التجميل بينصحوا دايما باستخدام الماسكارا البني للاستخدام اليومي, والماسكارا السودا للمناسبات الخاصة او الخروج بالليل, لكن النصيحة دي مش صحيحة.
لكن الصح هو استخدام لون الماسكارا الاقرب ما يمكن للون رموشك الطبيعية, او نفس لون الرموش بالظبط او الاغمق بدرجة بسيطة جدا عشان تتجنبي ان اللوك يطلع حاد اوي ابعدي عن الالوان البعيدة عن لون الرموش الطبيعي.
2- استخدمي اداة تني الرموش Eyelash Curler:
بعد اختيار لون الماسكارا المناسب تاني خطوة هي استخدام اداة تني الرموش قبل الماسكارا, لانها بتساعد على اظهار الرموش اكتر وبتديهم طول وحجم اكبر مع الماسكارا.
3- استخدمي Base Coat:
لو عايزة تضيفي طول وكثافة وحجم اكبر لرموشك استخدمي طبقة Base Coat او برايمر رموش قبل الماسكارا ولو مش متوفر عندك البرايمر ممكن يحل محله كريم العين استخدمي منه كمية بسيطة على الرموش هيديكي نفس تأثير البرايمر, لكن اتأكدي ان الرموش جافة تماما قبل تطبيق الماسكارا يعني اديه وقته ينشف على الرموش وبعدين حطي الماسكارا لانك لو حطتيها والرموش لسه رطبة هيعمل تكتل على الرموش ويديكي نتيجة عكسية ويطلع الشكل في النهاية مش حلو.
4- حطي اكتر من طبقة:
ما بين ماركات المكياج الكتير الموجودة مش هتلاقي بردو الماسكارا اللي هتديكي النتيجة المثالية اللي انتي عايزاها وتضيف طول وكثافة لرموشك, والطريقة الوحيدة عشان توصلي للنتيجة دي هو انك تحطي طبقتين من الماسكارا, حطي الطبقة الاولى واستني لما تنشف تماما وبعدين حطي الطبقة التانية لانك لو حطتيهم ورا بعض على طول هتلزق الرموش في بعض وهتعمل عليها تكتلات.
5- استخدمي تكنيك ال Zig-Zag:
عشان تضيفي طول وكثافة لرموشك اتأكدي من استخدام تكنيك الزجزاج وانتي بتحطي الماسكارا, وهي انك تحركي ايدك بتعرج بسيط وانتي بتحطي الماسكارا من الجذور للاطراف, والطريقة دي مش بس بتظهر الرموش اطول وشكلها كثيف اكتر لكن كمان هتخلق خط كامل للرموش وهيطلع شكلها مثالي جدا.
