الحواجب الطبيعية واحدة من اهم اتجاهات الجمال, والنهاردة من خلال موضوعنا هنقولك نصايح للحصول على حواجب مثالية في البيت بنفسك من غير ما تضطري تروحي لصالون التجميل عشان تظبطيهم.
– نصايح للحصول على حواجب مثالية:
اول حاجة اتأكدي ان حواجبك سميكة بما فيه الكفاية, ولو حواجبك من النوع الخفيف او مش سميكة دي مشكلة حلها بسيط ممكن كل يوم قبل النوم تدلكيها بزيت خروع, او زيت زيتون, او زيت لوز حلو, كل انواع الزيوت دي بتساعد على نمو الشعر بشكل اسرع, كمان النظام الغذائي الصحي ليه تأثير السحر على الشعر وكمان على الجسم كله, حاولي تدخلي في نظامك الغذائي الاسماك بما فيهم سمك السلمون, والمكسرات, والزبيب, ومنتجات الصويا, هتساعد على تحفيز نمو الشعر وتعزيز البصيلات في اسرع وقت.
– اختيار شكل الحاجب المناسب لشكل وشك:
1- الوش المدور: ارسمي الحواجب تكون عالية او مرفوعة من عند منطقة نص الحاجب, وابعدي عن رسمة الحاجب المستديرة لانها هتدي الوش استدارة اكتر.
2- الوش المربع: اعتمدي على رسمة الحاجب تكون واخدة شكل كيرفي او مدورة بس بشكل ناعم, ابعدي عن شكل الحاجب الرفيع او القصير.
3- الوش على شكل قلب: انسب شكل حاجب للوش على شكل قلب هو الحاجب الدائري المستدير لانه بيدي لوك طبيعي اكتر للوش لكن خلي التدويرة بتاعة الحاجب ناعمة وطبيعية يعني ميكونش مقوس اوي عشان ده ممكن يدي طول اكتر للوش.
4- الوش البيضاوي: اختاري رسمة الحاجب اللي بتكون على شكل قوس بسيط وناعم, يعني يكون بشكل مستقيم وبعدين ياخد شكل كيرفي ناعم في الاخر.
وعشان تحددي النقط التلاتة اللي بتحددلك شكل الحاجب بطريقة صح ممكن تستخدمي طريقة “القلم الرصاص”, حطي القلم في خط مستقيم على الانف من الجنب ودي هتكون بداية الحاجب, وبعدين حركي القلم للجنب ويكون ثابت عند طرف الانف ويمر بنني العين دي تبقى منطقة منتصف الحاجب, خلي القلم ثابت عن طرف الانف وحركيه لحد الزاوية الخارجية للعين دي هتبقى النقطة التالتة للحاجب, زي ما هو باين في الصورة.
– ازاي تنضفي الحواجب وتشيلي الشعر الزيادة بطريقة صح:
دلوقتي خلصنا من كل الحاجات النظرية حددنا شكل الحاجب المناسب وازاي نحدد النقط الاساسية في الحاجب, دلوقتي هنيجي للخطوة العملية وهي اننا ننضف الحاجب بالملقاط ونشيل الشعر الزيادة.
1- اول حاجة اتأكدي انك واخدة وضعية مريحة وفي اضاءة قوية, اختاري ملقاط يكون كويس عشان يشيل الشعر بسهولة.
2- تاني خطوة هاتي مكعب تلج مرريها على الحاجب من فوق عشان تمنعي اي تورم او احمرار او الم, او ممكن تدهني كريم مرطب.
3- ابدأي شيلي الشعر الزيادة من فوق بحرص جدا عشان متشيليش شعر زيادة عن اللزوم والحاجب يرفع منك اوي ويطلع شكله مش طبيعي, وبعد ما تشيلي شوية من الشعر ابدأي ارجعي لورا عشان تشوفي اوضح وتشوفي انتي ماشية صح ولا لا.
استخدمي فرشة الحواجب وسرحيها لفوق وهاتي مقص الحواجب الصغير او مقص ضوافر صغير وابدأي قصي الشعر الزيادة من فوق.
– ازاي تملي الحواجب:
دلوقتي هنيجي للخطوة اللي تعتبر الاصعب اللي هنملى فيها الحواجب ونحددها عشان نخليها اسمك ولكن بشكل طبيعي في نفس الوقت, ولو حواجبك افتح من لون شعرك ممكن تجربي تصبغيهم زي لون الشعر باستخدام صبغة الحواجب.
وخلي دايما في اعتبارك ان لون الحواجب لازم يكون قريب جدا من لون الشعر, لو اختارتي لون اغمق او افتح من لون الشعر بدرجتين الحواجب هيطلع شكلها مش طبيعي الى حد ما.
وممكن تملي الحواجب باستخدام القلم, او البودر, او حتى بالايشادو, او بماسكارا الحواجب, الرسم بالقلم هيديكي لوك طبيعي اكتر للحواجب, والرسم بالبودر هيديكي لوك سميك للحاجب, والماسكارا مناسبة للحواجب السميكة واللي بيكون شعرها خشن او صعب التحكم فيه بسهولة.
– الخطوات الاساسية للحصول على رسمة حواجب مثالية:
باستخدام فرشة الحواجب سرحي حواجبك وابدأي ارسمي خط للحواجب من تحت.
حددي الحاجب من فوق بالقلم, وابدأي املي الحواجب من جوه بس خلي بالك متخليش اللون قوي زيادة عن اللزوم عشان الحواجب متطلعش بشكل مش طبيعي خصوصا عند المنطقة اللي عند جسر الانف.
لو عايزة الحاجب يبقى متحدد اكتر وتسلطي الضوء على المنطقة اللي ما بين الحاجب والجفن, ممكن تحددي الحاجب من تحت بالكونسيلر وتمزجيه كويس على البشرة, وبعدين تطبقي هايلايتر على عضمة الحاجب.
