اليكي 4 وصفات طبيعية للشعر هتساعد على تنعيمة بطريقة فعالة جدا وتخليه قوي وبيلمع من أول كما تساعد على تطويل الشعر مع الاستمرار عليها.
وصفات طبيعية للشعر:
1- ماسك الالوفيرا:
المكونات:
2 معلقة كبيرة جل صبار الالوفيرا.
2 معلقة كبيرة مية.
ازازة سبراي
الطريقة:
حطي جل الصبار في البلندر واضربيه كويس لحد ما يبقى ناعم معاكي ومافيهوش كتل, ضيفي المية للجل واخلطيهم مع بعض كويس, صبي السائل ده في ازازة ببخاخ ورجيها كويس, رشي من الخليط ده على الشعر بعد ما تغسليه وينشف وسيبيه على الشعر كانك راشه الشعر سبراي عادي, كرريه من 3 – 4 مرات في الاسبوع.
جل الصبار يعتبر مصدر للانزيمات المحللة البروتين اللي بتساعد على اصلاح الخلايا التالفة الموجودة في فروة الراس, وده بيساعد على تحسين الشعر وزيادة نموه, بيساعد كمان على ترطيب الشعر وهيحافظ عليه رطب وملمسه ناعم وهيمنع هيشان الشعر طول اليوم.
2- مساج الزيت السخن:
المكونات:
من 2 – 3 معالق كبيرة زيت جوز هند او زيت زيتون.
فوطة سخنة.
الطريقة:
خدي كمية الزيت من 2 – 3 معالق حسب طول شعرك, وسخنيه لمدة ثواني على النار لحد ما يبقى دافي شوية مش سخن اوي, دلكي الزيت على فروة الراس وعلى الشعر كله لمدة 15 دقيقة, وبعدين سيبيه على الشعر لمدة 30 دقيقة كمان وغطيه بفوطة سخنة خلال الفترة دي, بعدها اغسلي شعرك بشامبو خفيف خالي من السلفات ممكن تستخدمي شامبو جونسون للاطفال, واخر حاجة استخدمي بلسم, كرري الوصفة مرتين في الاسبوع.
التدليك بالزيت السخن بيساعد على تنشيط بصيلات الشعر, وده بيزود نموه, ويعتبر علاج فعال ومكثف للشعر, كمان بيعالج مشكلة قشرة الشعر والحكة, زيت جوز الهند بيساعد على تغذية خصلات الشعر لانه بيحتوي على الدهون الثلاثية الغنية, كمان ليه قدرة على اختراق الشعر بعمق وده بيساعد على تغذية وترطيب الشعر بعمق, وزيت الزيتون غني بالمواد المضادة للاكسدة والاحماض الدهنية وفيتامين E اللي بتساعد في علاج الشعر وبتمنع وبتصلح تلف الشعر.
3- ماسك اللبن الرايب:
المكونات:
كوباية لبن رايب.
2 معلقة كبيرة املا بودر “هنلاقيه عند العطار, ولو مش متوفرة ممكن نستخدم حنه كبديل”.
الطريقة:
اخلطي المكونين مع بعض لحد ما يبقى عندك خليط سلس وناعم, حطيه على فروة الراس والشعر كله, وسيبيه لمدة 30 دقيقة, وبعدها اغسليه بشامبو خفيف وبلسم, كرريه من 1 – 2 مرة في الاسبوع.
اللبن الرايب بيحتوي على فيتامين B5, وفيتامين D اللي يعتبروا ضرورين جدا لصحة الشعر, بتساعد على تقوية الشعر من الداخل, وبتمنع قشرة الشعر, والماسك بيمد فروة الراس بفيتامين C اللي بيساعد على نمو الشعر.
4- ماسك البيض:
المكونات:
بيضة كاملة.
1 معلقة كبيرة زيت زيتون.
1 معلقة كبيرة عسل نحل.
طاقية شعر او كيس بلاستيك.
الطريقة:
اخلطي المكونات كلها مع بعض وقلبيهم لحد ما يمتزجوا مع بعض كويس, حطي الخليط على فروة الراس والشعر كله, غطي الشعر بالطاقية او الكيس البلاستيك وسيبيه لمدة 30 دقيقة, بعدها اغسلي شعرك بمية باردة وشامبو خفيف وبلسم, كرري الماسك من 1 – 2 مرة في الاسبوع.
البيض واحد من المصادر الغنية جدا بالبروتين وده بيساعد على تغذية الشعر وتحسين ملمسه, وبيساعد على اصلاح تلف الشعر, وبيدي لمعة وحياة للشعر الباهت, والانتظام على الماسك ده هيساعد على تقوية الشعر وتحسينه.
ضيفي ال 3 مكونات دول للشامبو واتخلصي من تساقط الشعر نهائيا
