دلوقتي بقت المكونات الطبيعية اللي موجودة في مطبخنا بتستخدم بشكل كبير في عالم التجميل ومن الحاجات التجميلية اللي بتستخدم فيها المكونات الطبيعية هي تفتيح الشعر او تغيير لونه, والنهاردة هنقولك من خلال موضوعنا طريقة تفتيح الشعر بالشاي باكتر من طريقة.
تفتيح الشعر بالشاي:
1- شاي الكاموميل “البابونج”:
شاي الكاموميل من الحاجات اللي بتساعد في تفتيح الشعر, ومش بس كده كمان ليه خصائص مرطبة ومغذية للشعر.
الطريقة:
اغلي 3 كوبايات مية كبيرة, حطي فيهم من 3 – 4 باكتات شاي بابونج, ولو هتحطي البابونج العادي المجفف حطي من 3 – 4 معالق كبيرة, غطي الخليط لمدة 30 دقيقة, قلبيه وصفيه, وصبيه في ازازة ببخاخ, ولو مش متوفرة ممكن تصبي الخليط على الشعر عادي, او تحطيه بفرشة.
اغسلي شعرك بالطريقة العادية جدا وبعدها رشي الخليط على الشعر ومتغسليش الشعر بعدها تاني, كرريها بعد كل غسيل شعر.
– وممكن يتعمل بطريقة تانية اغلي المية وحطي فيها الكاموميل, وسيبيه 30 دقيقة وبعد ما يبرد صفيه وضيفي فيه عصير عصير 3 ليمونات, و 2 معلقة كبيرة عسل, حطي الخليط على الشعر وسيبيه لحد ما ينشف وبعدين اغسليه.
2- شاي الليمون:
الطريقة:
اغلي 3 كوبايات مية, ضيفي للمية قشر ليمون حوالي من 4 – 5 ليمونات, سيبي القشر منقوع لمدة 15 دقيقة, بعد ما المية تبرد حطي لها عصير الليمون اللي اخدنا القشر بتاعه.
اغسلي شعرك وبعدين حطي عصير الليمون على الشعر كله وعرضي شعرك للشمس لحد ما ينشف, كرريها بعد كل غسيل شعر.
3- شاي القرفة والعسل:
لو شعرك غامق او اسود, شاي القرفة والعسل هيساعد على تفتيحه وهيديكي لون بني.
الطريقة:
ضيفي 3 معالق كبيرة قرفة مطحونة ل 3 كوبايات مية, سيبيهم يغلوا على النار لمدة 15 دقيقة, ارفعيهم من على النار بمجرد ما الخليط يبرد ويبقى يادوب دافي ضيفي له 2 معلقة كبيرة عسل نحل, قلبي الخليط لحد ما العسل يدوب فيه كويس.
اغسلي الشعر, حطي الخليط وسيبيه 5 دقايق وبعدين اشطفيه بالمية, ولنتايج افضل ممكن متغسليش الشعر بعد ما تحطي الخليط بس متضفيش العسل, تبقى المية والقرفة بس, كرري الطريقة في كل مرة تغسلي فيها شعرك.
